Veelsydige vesel
Ek dink ons vorige kosrubriek lê al diep in die argiewe en gaan dus net gou weer saamvat wat ons bespreek het. Toereikende vesel inname is krities belangrik vir algemene gesondheid. Dit is veral a.g.v die bepalende rol in dermkanaal gesondheid wat die grootste persentasie van ons immuniteit huisves. Toenemende navorsing wys ook dat vesel voorkomend is t.o.v verskeie lewenstyl siektes onder andere sekere kankers, diabetes, hartvatsiektes en obesiteit. Die kruks van die veselsaak is dat ons verskillende soorte vesel benodig, bekombaar deur ‘n verskeidenheid van volgrane te eet en voldoende groente en vrugte. Styselryke voedsel wat met vesel verryk word, is goed maar die beste is onverwerkte grane.
Kleuters behoort in die omgewing van 20g vesel per dag in te neem en kinders 25g (dogters) tot 38g vir tiener seuns. Kom ons kyk na ‘n algemene voorbeeld van kinders se dieet en hoe die veselinhoud dramaties verhoog deur slegs die styselkeuses te verander.
Praktiese Riglyne
Leë energie voedsel = koekies, Bacon Kips, Tuc, Cheddas, chippies, lekkers, koeldrank, roomys ens. Dit STEEL vesel en ander voedingstowwe want dit verplaas kos wat voedingstowwe moet gee. En in ruil vir dit wat hulle steel kry jy baie leë energie en moontlik baie ander nare goed. Klein kindertjies se eetgewoontes word grootliks deur hulle ouers bepaal (OORERWING!) en ons as ouers wil nie skuldig staan dat ons hulle van die wal af in die sloot ingestoot het nie. Leer jou kind die verskil tussen ‘n bederfie en kos. Daar is natuurlik plek vir bederfies, maar behoort maksimum 1-2 x/week aangebied te word.
Stel kinders van jongs af bloot aan ‘n verskeidenheid van voedsel, veral grane of stysels in onverwerkte vorm soos aartappeltjies met skilletjies aan, stampkoring, stampmielies. Hou aan met blootstelling in klein hoeveelhede as hulle nie daarvan hou nie.
Natuurlik sal aartappelskyfies baie meer aanklank vind by die gemiddelde kind as opgekookte aartappels in skille! Kinders moet ook leer dat ons meer keer die gesonder keuse moet maak, dalk i.p.v die lekkerder keuse. Wees kreatief met die gesonder keuse – oondgebakte baba-aartappeltjies of bietjie gekapte macadamias saam met ‘n skeut makadanmia olie op ‘n aartappeltjie kan tog nie sleg smaak nie?
Stadig oor die klippers. As kinders nie gewoond is aan hoë vesel voedsel nie, stel hul geleidelik bloot. Voorbeelde: Roer aanvanklik dalk net ‘n bietjie volgraan graankos soos Pronutro by hulle gewoontelike pap en maak geleidelik meer; kook klein bietjie bruinrys saam met die wit rys. Begin met lae GI witbrood as kinders gewoond is aan witbrood.
Frekwensie. As 80% van jul keuses die hoë vesel een is, geniet dan die geleentheid om julself die laer vesel keuses te gun soos Basmati rys of gewone pannekoek.
Maak seker die veselryke opsies is beskikbaar is in die huis soos springmielies i.p.v skyfies of semelmuffins i.p.v koekies.
Kos se veselinhoud kan gesupplementee r word. ‘n Kombinasie van semels (bran) en hawersemels (oatbran) kan by graankos en verfynde pap soos mabela gevoeg word. Smoothies is dikwels lekker vir middagetes in die somer. Vul die vrugte basis aan met ‘n hoe vesel ontbytgraan soos Future Life of Pronutro. Lensies en fyngemaakte droe bone is baie goeie verdikmiddels in bredies.
Semel muffins (24)
2 eiers
15ml bakpoeier
150g bruinsuiker
1 piesang, blokkies gesny
150ml Canola olie
1 koppie dadels, gekap
250ml hawermoutpap
5ml kaneel
375ml meel
400ml laevet melk
500ml Bran
5ml vanielje essens
2ml sout
Klits eiers,suiker en olie saam. Voeg al die ander droee bestanddele, piesang en dadels by. Meng goed. Meng melk en vanilla. Voeg by die meelmengsel. Meng net tot dit goed deurgeroer is. Laat staan oornag in die yskas. Meng deur en plaas lepelsvol in muffinpanne. Bak by 180 C vir 25min.
Beslag kan vir ‘n maand in die yskas hou
